Ammentos de Mare: S'Isula in curtzu

A incuru de Tore Cubeddu

VAI ALL'ARTICOLO IN ITALIANO DI ANNA BROTZU

Chentubinti segundos pro contare sa bellesa de sas costas nostras cun ammentos de nostalgia: una fèmina e s'istòria sua, intritzada pro fadu a su Mediterràneu.

Su mare, una passione sena fine, pro fàghere unu retratu de sa Sardigna: “Ammentos de mare” est su tìtulu de su curtzumetràgiu fatu dae Marco Caddeo e Nicola Baraglia, e publicadu in YouTube, chi mustrat s'incantu de sas costas e s'ammaju de Cala Domestica, paesàgios ispantosos, isprigu de s'ànima de una fèmina chi ammentat s'esistèntzia sua. Istòria de unu amore chi “mi nde furat ancora su coro”, sìmbulu de unu ligàmine cun s'ìsula in mesu a su Mediterràneu. Dae sas cursas in ispiàgia e sos cucurimbeddis in mesu a sas undas a pipia, a sas passigiadas in s'oru de su mare fatas a pitzinna, pro intèndere sa boghe de su bentu, su sonu de sa maretada e sos nuscos de una natura ancora incuntaminada.

Unu contu chi impreat sa limba mama, sos sonos antigos de su sardu, in una de sas variedades suas, ma chi in su matessi tempus est internatzionale pro more de sos sutatìtulos in italianu e inglesu. Sa fortza de sas immàgines, chi s'alternant cun sa cara de sa protagonista in edades diferentes in mesu a s'ispantu de Cala Domestica, acanta de Bugerru, in s'Iglesiente, nos torrat s'”ispìritu” de una Sardigna ìntima e segreta, comente chi una criadura e cussu elementu potente e inchietu, ma in su matessi tempus ammajadore, chi est su mare, torrent a una cosa sola.
Sa bisione de su sinu de mare inghiriadu dae falèsias càndidas, in ue s'arena fine si mesturat a sa giarra, in mesu a su chi abarrat de s'architetura mineraria, ammajadora e prena de mistèriu, si faghet a unu cun s'ànimu de sa fèmina. Su viàgiu sua de sa memòria paret chi pòngiat a cunfrontu sa fragilidade de s'umanidade passigera cun s'eternidade de sa roca, in su giogu sena fine de bentos e currentes.

Est casi unu ispot, “Ammentos de Mare”, in ue sa “règula” de sos duos minutos (e pagos segundos pro sos tìtulos) diventat una isfida: comente contare s'ìsula, o fortzis mègius su sentimentu de s'ìsula, in pagu tempus, mustrendende sa sa bellesa, ma fintzas su sensu de identidade e apartenèntzia, sa fieresa antiga de sa gente sua. Una fèmina benit a èssere su sìmbulu de cussu filu invisìbile chi incadenat sa mente e su coro, chi faghet nàschere una nostalgia chi su chi partit o si nche illargat non podet bìnchere, ma chi ddi cunsentit, in su matessi tempus, de torrare a agatare a isse etotu torrandeddu a acapiare a sas reighinas suas.
Criadura innamorada de s'abba – e mancari chi s'istòria nos contet chi biddas medas, a pagu tretu s'una dae s'àtera, pariant separadas pro semper e àteras a s'imbesse pariat chi s'esserent ghetadas in mesu a cussu pranu lìcuidu a bortas meda perigulosu, capatzu de nde cantzellare pro abrìtiu imbarcatziones intreas, sos documentos nuràgicos nos contant de una abilidade antiga de sos sardos in mare.

Su chi contat s'istòria portat in cara sos signos de su tempus – comente su bentu e sas mareas chi ant scolpidu sos paesàgios de sa pitzinnia sua, torrende a pintare su perfilu de sas rocas e de s'arena; s'esperièntzia e sa sabiesa de sos annos permitent de nos torrare su balore de sas cosas in una prospetiva prus manna.

“Ammentos de Mare” - fatu dae duos filmmaker sardos. Chi si sunt formados in s'ìsula, in sa Facultade de Iscièntzias de sa Comunicatzione, e su IULM de Milano, paret chi portent intre issos s'eco de sas partèntzias e de sas torradas, sa netzessidade de andare atesu pro agatare su chi mancat in s'ìsula e su disìgiu de torrare pro arrichire sa pàtria issoro cun cussas esperièntzias. E paris sa voluntade de mustrare a sos àteros sa bellesa de sa terra pròpria, comente si diat a fàghere miustrende sa fotografia de una fèmina bella e amada, sena nde fàghere a connòschere, ma faghendende intzertare s'ammaju prus disconnotu. Est cussu sentidu chi faghet mòvere sas cordas. Comente s'amore pro su mare.

Sa fortuna de su curtzumetràgiu – prus de milli visualizatziones a sa die, e chintinas de cundivisiones in sos socialnetwork – rapresentat, in prus de s'agiudu a sos autores, sa cunfirma de sa fortza comunicativa e de sas possibilidades de isparghinadura de sa retza. E àteras cunfirmas positivas lompent dae sa rivista online Paper Street, chi at fatu unu insertu ad hoc, e dae su situ Casteddu online. Àteros indìtzios – si mai nde tenimus bisòngiu – subra de su fatu chi s'immàgine de sa Sardigna diat a dèpere impreare semper de prus istrumentos noos, e fortzis, pro nois, cussos talentos nàschidos in s'ìsula e chi, isperende chi bi siet una nàschida culturale noa, con sa creatzione de sa filiera de su cìnema e de s'àudiovisivu, diant a pòdere agatare, fintzas in pàtria, manera e ocasione pro s'esprìmere.
Pro como, pro Marco Caddeo e Nicola Baraglia e s'“Ammentos de Mare” issoro, est tempus de cuncursos. E de bisos.