Stampa

Ischidados

Unu mamuthone nos at a salvare. di Tore Cubeddu

''Ischidados''Sos zombies sunt, segundu s'orìgine de su nòmene e de sas paristòrias chi benint dae Haiti e dae sa traditzione vudù, sos mortos chi bivent. Sunt medas sos film dedicados a custos personàgios mìticos. Chie no at bidu a su nessi una borta su film de George A. Romero Night of the Living Dead, unu film de su 1968 chi podet èssere cunsideradu su babbu mannu de su gènere.

A pustis de custu, medas pellìculas in totu su mundu ant tentu a protagonistas sos zombie, tantu chi, finas sos pipios nde connoschent carateristicas chi sunt coerentes cunforma a sa narrativa chi in annos los at creados. Totus ischint ca chircant de si nche papare àteros òmines bios chi podent bènnere a èssere àteros zombie e gasi sighende.

''Ischidados''Deo apo semper pensadu chi fessant cosas atesu meda dae inoghe finas cando no apo bidu ISCHIDADOS, su trailer de una sèrie ambientada in Sardigna, in ue a gherrare contra a s'invasione de custos zombie est unu mamuthone. “La storia di una Sardegna invasa dagli zombie, in cui non tutto è perduto: c'è qualcuno che è pronto ad opporsi, da sempre.”, gasi est iscritu in sa descritzione de su pilota.
Subra de custu traballu ddi at de fàghere duos cunsideros distintos, unu tècnicu e unu ideale: dae su puntu de vista tècnicu est unu traballu bellu meda, professionale, cun unu istile internatzionale, acanta meda a s'immàgine de riferimentu de su gènere; sa fotografia est cuntrastada, iscura e paris a unu montàgiu frenèticu (ma mai disordinadu) donat sa tensione giusta.

''Ischidados''Nadu custu s'idea de su mamuthone comente mortore de zombie creo siet unu pagu prus cumplicada, non pro ite so unu purista de sa traditzione, ma ca creo chi b'apat cosas chi apartenent a mundos fràgiles chi est mègius a non tocare. Poi b'est sa chistione de su nòmene “ischidados”, bellu, sardu, esòticu, comente totu sos nòmenes in sardu de cosas chi de sardu non tenet nudda.
ISCHIDADOS est unu progetu de interessu, forte e fantasiosu in su promo. Ispetamus a sa produtzione Chunk, bidimus comente ant a traballare in Sardigna, comente at a èssere s'isvilupu de una story chi pro como est unu tìtulu. In Sardigna, de seguru, ant a agatare agiudu mannu, professionistas atentos e contos de surbire. 

Il comunicato stampa

25 giugno 2014