Stampa

Sos mestieris de su cìnema: Francesco Pamphili – Vìdeu

Traduzioni di Tore Cubeddu - Su presidente de sa Kairosfilm est su produtore de su film “L’Accabaddora” de su regista Enrico Pau. Intervista de Enrica Anedda – ripresas de Valentina Corona

Francesco PamphiliVAI AL VIDEO

Romanu, artu, distintu, ogrigàtinu, tenet una manera de fàghere garbada e nointames s’esperièntzia sua longa in su mundu lughente de su cìnema no est presumidu, est ùmile e tratat cun totus.

Serrende, Francesco Pamphili non torrat cun su clichè clàssicu de su produtore barrosu chi arribat in sa terra de sos sardos a lis imparare comente si faghet cìnema. A s’imbesse, est curiosu meda e custu si bortat in una dote rara meda: sa capassidade de ascurtare a s’àteru. Capassidade chi belle che beru at imparadu in sos annos longos de atividade in sa professione de avocau, in antis de imbucare in sa carriera de produtore, posca afortiada cun sa pràtica fitiana in sa meditatzione trascendentale. No est de badas chi Kairos su nùmene de sa sotziedade sua de produtzione chèrgiat nàrrere su tempus de Deus, su mamentu giustu, intzertadu.

Bi fiat finas isse in s’atopu de sos operadores de su setore cìnema, cunvocadu sa chida colada dae s’Assessore a sa Cultura de sa Regione Autònoma de sa Sardigna, Claudia Firino: Pamphili pro oras meda at ascurtadu a sa muda finas a cussos chi in sos interventos issoro l’ant numenadu. Petzi a congruos de s’atopu, in su mamentu giustu, nd’at tzacadu una pregunta de importu: “Assessora, mi perdonet, a si podet ischire cales sunt sas summas intregadas a sos àteros setores de sa cultura? Custa est sa manera ebbia de cumprèndere s’atentu verdaderu de sa Giunta pro unu setore istratègicu finas dae su ghetu econòmicu che a su cìnema”. A dolu mannu s’Assessora no at ischidu (o chertu) torrare imposta. E a totus sos chi bi fiant est abarrada agangada un’àtera pregunta, custa borta fata a Pamphili etotu: “Comente est chi bi fiat un’atopu de sos operadores sardos?” s’isceda si podet petzi pessare.

Su produtore prus che beru in prus de s’iscenegiadura de L’Accabadora, s’est innamoradu finas de Casteddu e de sa Sardigna. Su film de Enrico Pau, est comomai acabadu e est in montàgiu, Cinemecum bos proponet una intervista fata s’ùrtima die de ripresas: su produtore contat s’esperièntzia sua in Sardigna e sas dificultades de su mestieri de produtore.


VAI AL VIDEO

 

Articoli correlati:

Il mistero de “L’Accabadora”, prime immagini dal set del film di Enrico Pau

Focus. "L'Accabadora": foto dal set e Crew List completa

17 dicembre 2014