''Scarabea'' de Hans Juergen Syberberg

di Tore Cubeddu

Scarabea, de Hans Juergen Syberberg est unu film de importu mannu in s'istòria tzinematogràfica sarda. Una prenda manna dae su puntu de vista artìsticu e linguìsticu puru, mancari chi su sardu non siat s'ùnica limba de su film.

Sos personàgios faeddant in tedescu, in italianu e in frantzesu puru, ma est sa presèntzia de sa limba sarda in su cuntestu narrativu su chi importat. Su film de su regista tedescu resurtat a intrare a manera funguda in sa sotziedade orgolesa e ulianesa da su tempus, in ue onni unu, cun respetu mannu pro su tempus e pro sa gente, est su chi est.
S'istòria, pigada dae su contu de Tolstoj “De canta terra abbisòngiat unu òmine”, pintat a manera crara finas su naturale de sos sardos, e s'iscumissa de Pachom, chi dae sa Sibèria lompet in Sardigna comente chi bi siat nàschida. Dae su cumintzu, Bach, su tedescu ricu chi diat a chèrrere comporare sas terras de sa costa pro nde fàghere sa “Costa Bach”, si cunfrontat cun unu mundu chi oe nos lompet cun su rigore de unu documentàriu e de unu documentu, una prenda de memòria, de limba, de figuras, de terra.
Custu film isperimentale, pagu connotu e pagu fortunadu, non podet mancare in su catàlogu de su tzìnema sardu.  

29 dicembre 2014