Stampa

"Capo e croce" de Paolo Carboni e Marco Antonio Pani

de Tore Cubeddu

''Capo e croce''Capo e croce est unu film de importu in s'istòria de su tzìnema in Sardigna. Marco Pani e Paolo Carboni ant sighidu pro prus de unu annu su Movimentu de sos pastores sardos, sas lotas issoro, e nos ant torradu unu film chi intrat in sus coro de sos òmines, "chi nos ant donadu a papare, chi nos ant fatu istudiare, chi nos ant caentadu pro generatziones". 

Sos pastores, pro custa terra nostra sunt de importu mannu. Lu sunt istados e l'ant a èssere. Custu film nos si l'ammentat cun seriedade, donende unu sensu a contos chi parent sena de càbodo, ponendelos in intro de una istrutura gramaticale, donendeli una sintassi, unu lèssicu. Su traballu de sos registas no est sa documentatzione frita de su chi est acuntèssidu in unu annu de gherras e atòbios, ca finas su sèberu de nde leare sos colores est su sinnu craru ca b'est sa manu de chie at ordingiadu, de chie at postu colonna sos elementos de sa narratzione.

Custu film chi, cun potèntzia manna, nos mustrat sa contemporaneidade nostra, est una pàgina de importu de s'istòria de sa Sardigna. Ancora una borta sos registas sardos, pro bona sorte de totus, sunt a s'ala de su chi naraiat Gramsci. Isse odiaiat sos indiferentes. Sos registas sardos puru, e Carboni e Pani l'ant fatu a bìere, regalende a totus sos sardos chi ant a bènnere unu capìtulu de importu fatu de orgòlliu, de defensa de sa terra, de su traballu e de sa salude.
Capo e croce est una prenda manna in sa videoteca nostra.

23 dicembre 2014