L'ultima frontiera

Diretto da F. Bernini, tratto da un racconto di Marcello Fois

CLICCA PER LA VERSIONE IN ITALIANO

2006 - «CIRCHENDI IS TREMINIS.”
Dirigiu de Franco Bernini, riportau de unu contu de Marcello Fois.
Acumpangiau de is sonus de Paolo Vivaldi e de sa boxi d’Elena Ledda.
Apparicciadura de is contus e de is logus de M.F.
Actoris=Stefania Orsola Garello, Francesca Satta Pintor, Nicole Grimaudo, Isella Orchis, Fabrizio Gifoni, Guido Capriano, Fausto Siddi, Gianpaolo Loddo.

SU FILU DE SU CONTU
A s’acabada de s’Ottuxentus, diaderus, in sa bidda de Oliena si funt disigiaus Gilietta e Romeu.Mischineddus de issus, no fiat nexi insoru a s’agatai a mesturu cun bandidus, milizianus, furonis nodius, meris mannus, feminas atrivias a xrobeddu de azarxu e a coru de angioneddu.
Is logus, is arroccas, is arrocallas, is mizzas, is bacus mannus e piticus, su Cologone, is narbonis, is montis de Oliena… in franzesu s’iat a nai “couleur locale’’.
Calincunu s’iat a recordai is coloris e is luxis de Lev Tolstoi.
Is tratus de is actoris e is manixius parint bessius de unu modelliu antigu. Feminas e ominis, chini totu est bistiu a sa sarda, a s’antiga, a sennoricu, a milizianu, a montraxiu…lassat inçertai ca una Iscola de Teatru in Sardigna at agatau unu sprigu de aqua de mizzas mannas.
Mariantonia, sa reina, Franzisca, su Tenenti, Elias, su milizianu mannu, actoris picioccus e picioccas ant circau de s‘acostai a is fueddus e a sa cerchiola de sa poesia nostra. Fausto mi ndi at torrau su regordu de unu tempus perdiu in s’airi de Casteddu. Insaras is bisus fiant lebius e liudus, oi ndi torrant in sa sabidoria e in sa passienzia.

-TIRRIAS- -STRUMPAS- -SPOSORIUS-
Mariantonia: meri manna sagrada chi portat, recordat e allogat is fueddus e is dicius antigus de is areus e de s’umanidadi. Issa puru chistionat prus cun is ogus che cun is fueddus.A bortas unu fueddu est unu corpu de balla. Totu Oliena parit chi ddi giochit in corpus. Tristura e morti bivint in issa chen’e tremula. Sceti sa morti at appaxiai a totus.
Franzisca: poderosa e firma, a bortas a trassa di omini, no timit ni a omini ni a Deus. Su chi narant is antigus po issa nu est lei ni de is angiulus ni de is dimonius. At a circai finzas s’agiudu de sa Cresia po biri chi su mundu fait contu de sa cunsienzia sua. Issa sceti at a renesciri a torrai a bisai e a biri diaderu torra sa razza sua comenti unu tempus. Una borta mortus su babai ,Mariantonia, bandidus e sordaus, issa at a renesciri a stimai impari su fradi Elias e su tenenti piemontesu.
Custa firmesa noa de is trattus e de is trassas funt is sinnus, comenti a sa muda, sa femina s’est furriada contr’a is leis de is umanus e de Deus e custas quistionis dd’as eus agatai in is feminas de is liburus de Grazia Deledda.

Sa contadora nostra, maista de una feminadoria noa e atrevia at sinnau su sentidu e s’animu de is feminas nuoresas de is tempus suus, mancai issas non d’essint tentu prexeri. Marianna Sirca ndi dda bessit de su coru; est issa bisada in d’unu contu e attaccat, a sa muda, totu sa gherra de su sentidu e de su coru suu.
“Sa furriada” de Grazia apparessit e sparessit in sa cara liuda e sagrada de “sa  reina” e de sa sorrixedda. Su sciallu chi si oberrit  e si serrat, cun manu firma, donat a crei a una feminesa beni inserrada e attaccada in su dolori, chi ponit in menti is cumandus de is mannus e de is antigus. Franzisca at circau sa nexi e si dd’at pigada a coddu. Sezzia a cuaddu issa si regollit in sa Natura e comenti una puba si bolat in s’airi de s’orbescidroxiu de Oliena.
Custa giovunedda at a lassai is sinnus de unu mori nou.

Grazia Deledda docet. Elias.  Sa sabiduria de sa genti, de is nuraxis est allogada i est abarrada in su sentidu de is poberus e de is arriccus. Elias s’at atreviri a sciolliri custu nuu e mancai atreviu at abarrai presoneri de is cadenas de sa soçiedadi piemontesa, de is sordaus e milizianus de is Savoias. Po sa lebiesa e po is bisus de Elias is piemontesus ant a sprazzinai sceti presonis, surras, boccidroxus de picioccus , ominis e feminas. Is bandidus, ominis fora de leis non conosciant che is leis e sa sabiduria de is Logus antigus de sa genti de is nuraxis e de Marianu e d’Eleonora de Arborea.

Sa Lei piemontesa fiat strangia e mala: is ominis de lei de su Renniu ammostant is furas,  is malefizius, is malesas, is apistongiaduras furriadas a lei chen’e guvernu e chen’e giustizia.
Medas sardus puru fiant peus de is piemontesus e calincuna rexini mala dd’iat a essiri minescia de si siccai. Is scorrius de s’anima funt abarraus in is tempus andaus e di oi.
Elias tenit de zaccai e regolliri corpus sceti po mori de s ‘inclinamentu e de sa fidi in is fueddus suus. Elias, bellixeddu che unu frori, alladiat totu sa ricchesa sua in is padentis, is logus , in is prazzas de Oliena , in sa Natura. Su presoni puru, po mori de is leis malas, at allogai sa cara liuda sua e su bisongiu de Leis, de moris e de Giustizia  noa.
Su tenenti: su tenenti piemontesu parit ca si nc‘est fuiu de unu dagherrotipu: a ddu biri in mesu de is Tancas, de is narbonis, de is bacus, roccas de perda murra, schistus, moris, passialis…e su mari a canta e attesu comenti de una tentazioni. S’iat a nai ca fiat bregungiosu di essi piemontesu. S’intendiat sardu e sa stima po Franzisca no dd’attaccat in perunu logu. Po essiri a beru sardu toccat a sunfriri e a bocciri sa pobera genti.Is bandidus no fiant malus; sa giustizia piemontesa fiat mala e strupiada, aundi podiat is pensamentus e is rexonis de is Sardus.

IS SONUS
Sa musica de Paolo Vivaldi assimbillat in medas logus a pinturas “impressionistas” franzesas. Su coru e s’anima s’ atrevint a si castiai a intru e a foras.
Luxis, lampus e tronus lassant su logu po su dolori de sa boxi d’Elena Ledda. Issa, citia citia, intrat in s’amargura de su Sentidu sardu e prangit sa quescia de is feminas sardas.

FRANCO BERNINI
Issu at castiau a Oliena cun is ogus de su sentidu e de su coru. Is logus de di e de notti ndi torrant in is faccis de is actoris.
Luna o crescenti alluinat totus is logus e su Monte Corrasi e is passus inçertus, po dudosus de is bandidus
Pagu pagu de s’anima de Salvatore Satta at saludau e imprimiu in sa memoria sa bellesa de Oliena.

25 settembre 2013