Percorso

Su tzìnema in TV, “la guardi e non c’è più”

Di Tore Cubeddu

Home videoUna borta bastaiat a l’allumare sa TV, pro agatare unu film, pro pòdere gosare de cussa maja chi solu annos a pustis est lòmpida cun s’home video in totu sas domos nostras. In sas biddas prus piticas fiat s’ùnica manera, ca de tzìnemas non bi nde aiat o, mancari, ca sas salas fiant tropu atesu. In sos ùrtimos annos totu est cambiadu.

Sos film, prima sunt passados in manu de pangàrgios tribetosos chi los ant masellados a tenore de sa publitzidade imperante, a pustis a pagu a pagu sunt isparèssidos dae sos palinsestos. Pro ite? Ite at acuntèssidu, in ue est sa fratura chi non permitit prus unu acòrdiu intre mundos chi si sunt influentzados semper prus? B’apo resonadu meda e ancora non resesso a cumprèndere comente siat possìbile chi Rai e Mediaset dèdichent semper prus pagu ispàtziu a su tzìnema, ma ancora de prus, in unu tempus in ue s’esigèntzia de contenutos est manna meda, non cumprendo comente siat possìbile chi intre sas televisiones locales e su tzìnema indipendente non siat nàschidu unu acòrdiu de agiudu chi podet èssere profetosu pro totus.

L’ischimus, sa distributzione est “sa chistione”, sa cosa chi prus de totu faghet sunfrire chie traballat a unu film. Ma issaras, finas in Sardigna, pro ite non traballamus pro chi sos mèdia si torrent a atobiare in unu progetu comunu? Sos sardos, comente totu sos tzitadinos tenet deretu a sa cultura e su tzìnema est unu motore de connoschèntzia, de bellesa e de informatzione comente pagos.

Dae como onni àndala, onni carrela non podet prus sighire a sa sola, in calchi manera unu rugradis bi depet èssere. Ma pro lu fraigare bi cherent prus istradas. Provamus a li dare sa diretzione.

19 novembre 2014

Powered by CoalaWeb

Accesso utenti e associazioni