Percorso

“Cìnema e Fumetu” cun Diabolik e Kriminal

Traduzioni di Tore Cubeddu - Dae sos B-movies de sos annos sessanta a sos film de animatzione made in Sardinia. de Elisabetta Randaccio

''Kriminal''Pro sa de bator rassinnas de “Cìnema e Fumetu”, in sa Cineteca Sarda de s’arburada Triesta 126 in Casteddu dae su 6 a su 18 de làmpadas, sos contivigiadores Bepi Vigna e Antonello Zanda ant seberadu unos cantos film chi nos nche giughent a sos annos de cando s’indùstria cinematogràfica fiat in su mègius andare, cando trionfaiant in su boteghinu sos longu metràgios de gènere.

Sos produtores de custos ùrtimos, a s’ispissu, fiant sos matessi chi poniant sos investimentos issoro in sas òperas de grandu aotores che a Fellini, Visconti, Antonioni. Est a nàrrere, unu cìnema poderadu dae sos gustos de su pùblicu populare e amadu, de unu ghetu, dae sos intelletuales; unu modellu produtivu chi binchiat, in ambas sas possibilidades artìsticas, in su mercadu internatzionale. Unu mundu a tesu e, in sustàntzia, chi non si podiat recuperare.
Su cìnema de gènere teniat su dòpiu suo, a s’ispissu, in su fumetu, chi connoschiatr in su matessi tempus una bona sorte sighiu dae su pùblicu ampru. Gosi, unos cantos eroes de sos comics los aiant bortados pro su ischermo mannu pro chircare de ammesturare sa passione pro su fumetu cun cussa pro su cìnema.

''Diabolik''Chie at sighidu in custos bator annos sa rassinna proposta dae sa Cineteca sarda at tentu s’ocasione de bìdere unos cantos esempros de inferèntzia artìstica, pessamus pro esempru a su “Diabolik” de Mario Bava, traspositzione originale, cun referèntzias a sa pop art de interessu, chi giughiat in sala su personagiu gasi famadu creadu dae sas sorres Giussani. Sighende custa àndala de s’eroe nieddu aiant fatu “Kriminal”, disinnadu dae su grandu Max Bunker: unu personàgiu chi non podiat èssere ismentigadu dae sos produtores de tando. Gasi, s’incàrrigu l’aiant dadu a Umberto Lenzi, unu regista chi lu pessaiant pro tempus meda – gasi comente marcadu dae Bepi Vigna in s’introduida de sa rassinna – petzi comente mestierante, mentras sas capassidade suas tècnicu-artìsticas nde bogant che a unu mastru de su cìnema de gènere italianu, ammiradu finas dae Quentin Tarantino.

''Il marchio di Kriminal''“Kriminal” (1966) est unu traballu bonu (de non pèrdere sos tìtulos cun sa subrapositzione de sos disinnos de Bunker a sos fotogrammas de su film) chi tiraiat cara a una spy story a sa James Bond, comente sos gustos de tando rechediant. Su segundu film propostu in sa rassinna est galu una variatzione subra su personàgiu de Kriminal: “il marchio di Kriminal” de Fernando Cerchio (1967).
De non pèrdere a seguru “La strage dei vampiri” de Roberto Mauri, ca est unu film chi non s’agatat prus in italia, finzas in DVD. Sa curiosidade prus manna de custu curtzumetràgiu est sa presèntzia, intre sos atores, de Luigi Batzella chi faghet su dut. Nietzsche misteriosu (!).
“Nuda per satana” Batzella, nàschidu in Santu Sparau, ue at istadu finas a si nche mòrrere in su 2008, est istadu tra sos annos sessanta e sos primos annos otanta su “re” de su B-movie, ghiende, a pustis de una carriera de cumprimàriu in sa recitatzione, film de cada genia; spaghetti western, horror (ue si notat su cult “Nuda per Satana”, 1975) nazi exploiation, bèllicu, eròticos….Sa figura sua tenet in intro pròpriu cussu cìnema industriale e cummertziale chi fiamus narende in antis, in ue auniat passione e ironia.

''Nuda per satana''A lu torrare a iscobèrrere, cheret nàrrere a bogarea campu torra pàginas de cìnema e cultura populare. “La strage dei vampiri” esistit petzi in sa versione inglesa e l’ant a proietare su 13 de làmpadas cun sutatìtulos in italianu fatos dae Massimo Spiga, mentras una mustra pitica de fotos de iscena de sos film interpretados e diretos dae Batzella l’ant a fàghere in sa sala de sa Cineteca.
Semper su 13 de làmpadas ant a fàghere sa presentada de su libru “Linee di sangue”, unu testu a fumetos cun a tema sa figura de su vampiru disinnadu dae unos cantos autores italianos; unu esempru acisadore de sa vitalidade de custu gènere artìsticu in su paisu nostru. S’ùrtima serada est dedicada a s’animatzione fata dae autores sardos, chi sunt traballende subra una tipologia cinematogràfica galu pagu tastada dae sos registas isulanos. Ant a proietare “Bella di notte” de Paolo Zucca, “Il mondo sopra la testa” de Peter Marcias e tres curtzos de Maurizio Casu e Lorenzo Lepori: “The Skeletoon Show”; “Una brutta notte di un bel giorno d'estate” e “At the beginning of life”.

Traduzione da: “Cinema e Fumetto” con Diabolik e Kriminal

3 dicembre 2014

Powered by CoalaWeb

Accesso utenti e associazioni