Janas Tv, cìnema e youtube: “Unu veìculu meriticràticu verdaderu”

Traduzioni di Tore Cubeddu - Intervista cun sa regista nugoresa Pj Gambioli, chi at seberadu de andare foras de s’ìsula, pro non fàghere a mancu de sa libertade espressiva cosa sua. de Monica Galloni

Sa manera ebbia de fàghere unu traballu bonu a beru est cussa de amare su chi faghes”. Est su mentovu famadu de Steve Jobs chi presentat Janas Tv: unu canale partner de youtube a su cale si podet iscrìere a indonu e gosare de vìdeos, documentàrios, curtzumetràgios e web series, impitende unu cale si siat service e agatende·si in cale si siat natzione.

Est custa s’iscommissa personale creativa de Pj Gambioli, nugoresa de orìgine, chi at seberadu de andare foras de s’ìsula pro “fàghere su chi m’agradat, a m’agatare unu target de pùblicu, contribuire a manera ativa a sa promotzione de sa terra mea e a non renuntziare a sa libertade espressiva mea”.

Ses una sarda chi tramudende a fitianu dae sa terra sua at tentu ocasione de tènnere una mirada de insieme de comente funtzionat su cìnema e sa cultura foras de s’ìsula. Nara·nos sas tramudas prus de importu. Como chi est como istas in Rimini, annò?
Como isto in Rimini fintzas si dae su ghetu professionale chirco de sighire s’atividade mea finas in Sardigna. Pro nàrrere, in custos tempos sigo sa regorta fìlmica e sa web series dedicada a Autunno in Barbagia, comintzada s’annu coladu cun unu tour de 10 biddas e chi sighit ocannu cun una programmatzione de àteras 8 puntadas chi si pondent bìdere in Janas Tv. Su progetu m’intzitzilligat meda ca sende barbaritzina amo e reconnosco s’importu de sas traditziones locales nostras, in prus de su potentziale de sos territòrios nostros a fitianu abrios e a bortas pagu connotos non petzi dae su turista ma finas dae su sardu etotu. Su biàgiu at semper fatu parte de sa vida mea: pro traballu o pro istùdiu sa cosa de capia est cantu sìesperièntzia ti lassat in chistione de impèllidas e acaradas noas.

Cales pessas chi siant sas resursas de pòdere isvilupare pro resessìre a fàghere cìnema in Sardigna, dae unu ghetu polìticu e mancari dae unu ghetu de mentalidade, ite mancat a parre tuo dae banda de sas istitutziones?
Sa mirada de su traballu meu in sos annos at mudadu mescamente a pustis de unu atinu a su comintzu dolorosu. Su cìnema pro mene oe no est prus unu mèdiu de comunicatzione a su cale semus avesos pro deghènnios. Est comente dae su biancu e nieddu semus colados a su colore o sinono dae su mudu a su sonoru. Como su cìnema no est in sas salas ma in su web. E su Web lu tenes in bugiaca, in bursa, in una iscrivania. Su Web si mustrat prus meritocràticu ca ti permitit una distributzione low budget, t’assegurat una vetrina in su mundu e mescamente dat impèllida a essire dae sos ischemas. Est unu otzèanu malu a colare ma est una ocasione dada a totu cussos chi tenent carchi cosa de nàrrere. Fatzo un’esempru: giras unu film e a pustis una pelea manna e dinari gastadu pro acumprire su progetu a su cale as dadu ànima e corpus, acò chi no andat nemmancu in sala. O sinono lu proietant pagas bortas. S’arte sena pùblicu arriscat de èssere fine a issa etotu. In Italia bi sunt unu muntone de film (finas produidos cun dinari meda) chi non sunt mai essidos in sala, e su problema acapiadu a sa distributzione no est de pagu contu. Sunu oportunidades fartadas, mescamentes pro sos registas indipendentes, chi siant pitzinnos o pru mannitos.

Cales sunt sas problemàticas chi acumonant chie chircat de fàghere cìnema in custu perìodu?
Finas a carchi annu a como su problema “distributzione” “l’abbrandaiant” cun su istupare de festival e rassignas chi daiant unu tretu vitale a sas produtziones minores. Oe custu setore est in crisi. In s’andare de sos annos, mescamente ammaniende sa rassigna de su cìnema indipendente sardu itinerante, apo tentu ocasione de m’acarare non petzi cun medas registas indipendentes ma finas de acumprire collaboratziones cun àteros organizadores de festival natzionales e internatzionales. Pro esempru in Rimini collàboro cun su Cartoon Club Festival internatzionale de animatzione e fumetu chi pròpriu ocannu at festadu sos 30 annos de trabbalu de gabbale in su territòriu emilianu. Dae s’acarada intre operadores e organizadores su datu chi essit a campu e chi nos acumonat est isporosu. Nointamas s’impinnu, medas festival ant dèpidu mudare sa programmatzione, unos cantos ant serradu, àteros comente a nois de su Cìnema Indipendente Sardu s’ant leadu tempus pro meledare. Paret chi cale si siat formatzione polìtica che lompet a su guvernu no acuntentet meda: a faeddos impromitint investimentos in sa cultura ( e pro cultura naro finas cussa de s’immàgine, bidu chi est sa prus potente e atuale forma de comunicatzione chi tenimus a disponimentu), ma cun sos fatos mustrant s’imbesse. Sa cosa chi est mala a ispiegare est chi de cultura non petzi si bivet mègius, ma est una “indùstria” sustenìblie, ecològica, respetosa, megiorosa. Est una azienda a tretu de fàghere girare s’economia e de frunire paritzos postos de traballu.

Conta·nos de sas diferèntzias e de sos puntos a cumone chi as agatadu in sos paritzos logos ue as andadu pro traballu.
Si mi pedis si bido diferèntzias non m’agradat a lu nàrrere ma in Italia pro mene balet su ditzu “totu su mundu est bidda” ca dae su ghetu polìticu siat natzionale siat regionale bido aturas de omologatzione, iddeas pagas, coràgiu pagu e repitende semper sos matessi ischemas. Pro custu semper prus a s’ispissu, cando pesso a su Cìnema mi pesso chi s’annoamentu e su Web nos podent agiudare a agatare ocasiones noas. YouTube e sos Social Network dae sa mirada mea, sunt una oportunidade chi sos cineastas indipendentes ant semper bisadu: su de tènnere a disponimentu issoro unu ispàtziu/vetrina chi iscàmpiat cara a unu pùblicu internatzionale, chi intrat in sas “domos” prus a sa lestra de sa televisione ( chi non de badas est in crisi finas issa) e chi est in prus a indonu… ca sa vetrina no la pagas!

Conta·nos de sa nàschida e de s’isvilupu de Janas Tv e s’idea chi b’at a palas de sa web serie fortunada PAUSA PRANZO e comente a custa ais dadu vida.
Cun custa miradanaschet Janas Tv, unu canale pertner de YouTube a su cale ti podes iscrìere a indonu e gosare de vìdeos, documentàrios, curtzimetràgios e web series impitende unu cale si siat device e istende in cale si siat natzione. Janas Tv tenet visualizatziones dae cada parte de su mundu, creschet onni die e proponet vìdeos chi si podent cumpartzire a gratis. Custa est s’iscummissa creativa mea: fàghere su chi m’agradat, buscare unu target de pùblicu, dare unu contributu a sa promotzione de sa terra mea e a non renuntziare a sa libertade de espressada mea. Sa programmatzione de Janas Tv est semper mudende. Su palinsestu est bàrgiu: semus mòidos dae sa produtzione de una filera de documentàrios subra sa oghina sarda e romagnola, a sas artes e mestieres, a sas puntadas de Autunno in Barbagia, a sos curtzos de su cìnema indipendente pro lòmpere posca a sa produtzione reghente de sa web series de Pausa Pranzo. Custa idea est agradada meda a sos imprendidores emilianos, e est nàschida dae su disìgiu de traballare subra sa comitzidade. So dae semper amantiosa de coghina bona e duncas comente a nàrrere apo crobadu s’ùtile a su discansosu. Cun Pausa Pranzo amus finas “isbarcadu” in su cìnema… unu teaser chi est imbeniente a sa visione de longumetràgios est pro mene sinnu chi su camninu incarreradu est cussu giustu… De pausa Pranzo contivìgio sos testos e sa regia, s’atore est su riminesu Marco Giulio Magnani, sa mùsicas originales de sa composidora Serena Giannini.

Unu bisu chi dias chèrrere acumprire?
Unu bisu in su calàssiu? Mi diat agradare a girare ina sèrie de puntadas de Pausa Pranzo in Sardigna…mi fuit su risitu pensende a comente at a fàghere unu rapresentante riminesu peleende cun unu bellu cantu de porcheddu a orrostu…

Traduzione di Janas Tv, cinema e youtube: “Vero veicolo meritocratico”

3 dicembre 2014