''Treulababbu'' de Simone Contu
de Tore Cubeddu
Treulababbu est unu film de importu mannu pro duas resones: sa prima pro ite ca est unu contu pro mannos e minores (sos pipios nde sunt protagonistas) comente ancora non nde aiant fatu in Sardigna; s'àtera est ca est in sardu e chi sa limba no est foras dae s'istòria, nde est parte, ca pro more de issa benint a pìgiu ideas e piessignos chi donant richesa a su contu matessi.
Su film est divididu in duos contos. Su primu, Sa Règula, chi contat una istòria bella meda a pitzu de s'idea de règula intro de babbu e fìgiu, sa segunda, su Molenti de Oramala, chi invetzes ponet in campu una istrutura tìpica de su fantasy e de su “biàgiu de s'eroe”: unu pipiu, pro lòmpere a s'obietivu sou, depet superare provas meda. Ambas sas istòrias tenet pipios a protagonistas e ambas duas sas istòrias intrant a manera abista, ma respetosa, in sa sotziedade sarda, isfrutende cun sabiesa contos antigos in unu cuntestu narrativu modernu e contemporàneu.
Treulababbu est su traballu de unu regista bravu e meda capassu, chi de seguru at a pòdere fàghere ancora meda pro su tzìnema e finas pro su sardu, ca lu diat a impreare a sa mègius manera, promovendelu sena ideologias o pregiudìtzios.
Treulababbu est unu de cussos film chi depet èssere mustradu in totu sas iscolas sardas e pro custa resone non podet mancare in sa videoteca nostra.
29 dicembre 2014